Samþykkja aukinn stuðning við Afganistan

Valgerður Sverrisdóttir utanríkisráðherra sat í dag utanríkisráðherrafund Atlantshafsbandalagsins sem haldinn var í Brussel. Eftir því sem fram kemur í tilkynningu frá ráðuneytinu var meginumræðuefni fundarins aðgerðir bandalagsins í Afganistan og staða mála í Kósóvó.

Ákveðið var á fundinum að auka stuðning í Afganistan bæði á sviði efnahagsmála og hernaðar, en þar hefur staðið yfir löng og hörð barátta við uppreisnarmenn talbiana.

Condoleezza Rice, utanríkisráðherra Bandaríkjanna, greindi frá því að Bandaríkjastjórn myndi leggja um 700 milljarða króna fram til stuðnings Afganistan, en þar af fer stærstur hlutinn í að þjálfa og vopnbúa afganska hermenn.

Þá þrýstu Bandaríkjamenn á aðrar NATO-þjóðir að leggja sitt af mörkum eftir því sem segir á vef breska ríkisútvarpsins. Samkvæmt tilkynningunni frá utanríkisráðuneytinu tilkynnti Valgerður á fundinum að Íslendingar ætli að styðja enn frekar við endurreisnarstarf og uppbyggingu í Afganistan.

Þá sat ráðherra fund með ýmsum samstarfsríkjum bandalagsins og fulltrúum alþjóðastofnanna. Á morgun mun Valgerður eiga fundi í Davos í Sviss með ráðherrum annarra EFTA-ríkja og Indónesíu og Egyptalandi en þar fer nú fram fundur Alþjóðaefnhagsráðsins (World Economic Forum).

.