Heildarsamtök aldraðra og fatlaðra koma ekki að framboði

Heildarsamtök aldraðra og fatlaðra koma á engan hátt að undirbúningi framboða til Alþingis sem kynnt hafa verið sem framboð öryrkja og aldraðra. Þetta kemur fram í yfirlýsingu frá formönnum Landssambands eldri borgara, Sjálfsbjargar - landssambands fatlaðra og Öryrkjabandalags Íslands.

Þar segir enn fremur að samtök aldraðra og fatlaðra starfi á þverpólitískum grundvelli að hagsmunamálum félagsmanna sinna og hafi engin áform uppi um framboð til Alþingis í kosningunum í vor.

Áhersla sé lögð á eitt samfélag fyrir alla undir kjörorðinu „Ekkert um okkur án okkar" og hvetja formennirnir öryrkja og aldraða til að vera virka þátttakendur á vettvangi stjórnmálanna á þeim grunni, hvar í flokki sem þeir standa.