Ekki farið ískönnunarflug í dag

Landhelgisgæslan mun ekki fara ískönnunarflug til Vestfjarða í dag þar sem það er orðið of áliðið til að fara af stað. Rafall í Fokker-vél Gæslunnar bilaði í gær og var ekki lokið við að gera við hann fyrr en nú. Birta fer nú þverrandi og því telja Gæslumenn að þeir eigi ekkert erindi á Vestfjarðamið.

Fréttir bárust af því í morgun að hafísspangir rækju í átti til Vestfjarða og er ein þeirra aðeins þrjár sjómílur út af Barðanum á milli Dýrafjarðar og Önundarfjarðar. Þá var önnur í morgun aðeins átta sjómílur undan Grænuhlíð í norðanverðu Ísafjarðardjúpi. Ísinn sést í ratsjám og ætti skipum og bátum því ekki að stafa hætta af honum.