Hótar hertum samkeppnislögum ef matarverð lækkar ekki

Fjármálaráðherra hótar hertum samkeppnisreglum ef aðgerðir stjórnvalda til að lækka matarverð skila ekki árangri.

Aðspurður eftir ríkisstjórnarfund í morgun hvort um óeðlilegar hækkanir hefði verið að ræða að undanförnu hjá heildsölum sagði Árni Mathiesen fjármálaráðherra að hann gæti ekki fullyrt um það að svo stöddu. Hins vegar væri það ljóst að þær breytingar sem gerðar hefðu verið á lögum um virðisaukaskatt og vörugjöld væru prófsteinn á það hvort það væri nægjanleg samkeppni á matvælamarkaði.

Aðspurður hvað yrði gert ef lækkanir á vörugjöldum og virðisaukskatti skiluðu sér ekki til neytenda sagði Árni að hann vildi enn trúa því að kaupmenn og heildsalar hefðu metnað til að skila lækkununum að fullu til neytenda.

Ef það gerðist ekki hlyti það að liggja í augum uppi að farið yrði ítarlega ofan í samkeppnisreglur og séð hvað hægt væri að gera til þess að auka samkeppni. Ef þetta gengi ekki eftir væri augljóst að það væri ekki nægjanleg samkeppni á matvælamarkaði og hún hefði áhrif á verðhækkanir.