Vinstri - grænir stærri en Samfylkingin skv. könnun Frjálsrar verslunar

Vinstri - grænir mælast stærri en Samfylkingin samkvæmt skoðanakönnun sem Frjáls verslun gerði fyrir vefsvæðið heimur.is dagana 17. til 22. janúar.

Samkvæmt könnuninni nýtur Sjálfstæðisflokkurinn fylgis tæplega 39 prósenta landsmanna, Vinstri - grænir koma næstir með 20,5 prósent og þar á eftir kemur Samfylkingin með tveimur prósentum minna fylgi en Vinstri - grænir.

Framsóknarflokkurinn mælist hins vegar með rúmlega ellefu prósenta fylgi, sem er ívið meira en í síðustu könnunum, og þá mælast Frjálslyndir með rúmlega níu prósenta fylgi. Samkvæmt þessu heldur ríkisstjórnin velli en með naumindum þó. Um 56 prósent aðspurðra tóku afstöðu í könnuninni.