Samgönguverðlaun veitt í vor

Samgönguráðherra hefur komið á fót sérstökum samgönguverðlaunum sem ætlunin er að veita árlega einstaklingi, samtökum eða stofnun sem þykir hafa lagt fram verðmætan skerf á einhverju sviði samgöngumála. Um er að ræða peningaverðlaun auk verðlaunagrips.

Eftir því sem fram kemur á vef samgönguráðuneytisins er öllum frjálst að koma með tilnefningar til verðlaunanna og mun starfshópur meta þær og jafnvel koma sjálfur með ábendingar. Tillaga hópsins verður svo lögð fyrir samgönguráðherra til ákvörðunar.

Verðlaunin verða veitt í fyrsta sinn í vor og er hægt að skila inn tilnefningum til ráðuneytisins til 1. mars næstkomandi.