Gengið frá lista Sjálfstæðisflokksins í Suðurkjördæmi

Sjálfstæðismenn í Suðurkjördæmi ganga frá lista sínum fyrir komandi Alþingiskosningar á sunnudaginn kemur. Prófkjör flokksins í kjördæminu fór fram í nóvember síðastliðnum. Þeir sem urðu í sex efstu sætunum þar fengu allir bindandi kosningu nema Kjartan Ólafsson.

Sveinn Pálsson, formaður kjörnefndar Sjálfstæðisflokksins í Suðurkjördæmi, staðfesti í samtali við fréttastofuna að samkvæmt tillögunni sem lögð verður fram á fundinum eru sex efstu sætin óbreytt. Árni M. Mathiesen skipar fyrsta sæti, Árni Johnsen annað sæti, Kjartan Ólafsson þriðja sæti, Björk Guðjónsdóttir fjórða sæti, Unnur Brá Konráðsdóttir fimmta sæti og Drífa Hjartardóttir sjötta sæti.

Tillaga að listanum verður lögð fyrir fund kjördæmisráðsins á sunnudaginn en fundurinn verður haldinn í Hveragerði og hefst klukkan tvö. Þar geta fundarmenn annað hvort greitt atkvæði um listann eða komið fram með breytingartillögur á honum. Nokkrar vangaveltur hafa verið uppi um hvort að á fundinum komi fram tillögur sem lúta að sæti Árna Johnsen á listanum en ekki hafa allir verið á eitt sáttir með hans hlut. Fordæmi eru fyrir því að breytingar hafi verið gerðar á listum flokksins á fundi kjördæmisráðs.