Ríkisendurskoðandi fékk ekki trúnaðarskýrslu um Byrgið

Sigurður Þórðarson ríkisendurskoðandi er kallaður fyrir fjárlaganefnd Alþingis á morgun til að ræða eftirlit með framlögum og styrkjum til aðila utan velferðarkerfisins. Ríkisendurskoðandi fékk ekki í hendur trúnaðarskýrslu um fjárreiður Byrgisins sem gerð var af fulltrúum þriggja ráðuneyta. Þrátt fyrir það vísar formaður fjárlaganefndar alfarið ábyrgðinni á skorti á eftirliti til Ríkisendurskoðunar.

Byrgið hefur fengið opinber fjárframlög sem hljóða upp á um 200 milljónir króna. Nú síðast var samþykkt fjárframlag til Byrgisins í fjárlögum fyrir árið 2007 sem ekki verður af.

Ríkið hefur lagt til húsnæðið að Efri-Brú í Grímsnesi. Þrátt fyrir það áttu menn að vita að ekki væri allt sem skyldi í fjármálum heimilisins vegna opinberrar skýrslu starfshóps sem í sátu fulltrúar þriggja ráðuneyta. Skýrslan var hins vegar stimpluð trúnaðarmál og henni stungið undir stól.

Formaður fjárlaganefndar sem nú nýverið samþykkti áframhaldandi styrki til heimilisins var í starfshópnum sem gerði trúnaðarskýrsluna. Hann hefur sagt að það hafi ekki verið sitt hlutverk að koma upplýsingum úr skýrslunni áfram til þeirra aðila sem tóku ákvarðanir um fjárframlög. Og þegar hann er sjálfur búinn að vera formaður fjárlaganefndar frá því í haust vísar hann ábyrgðinni á ríkisendurskoðanda.