Kalla mig Ömmu diskó

Helga Möller söngkona á afmæli í dag. Þessi ástsæla söngkona sem hefur fyrir löngu sungið sig inn í hug og hjörtu þjóðarinnar stendur nú á fimmtugu. Hún hefur þó engu tapað af lífsgleði með árunum, nema síður sé, enda sísyngjandi.

Það stendur ekki til að halda neina veislu í tilefni dagsins, enda óvanalega mikið að gerast í dag. „Ég ætla að kjósa og gera eitthvað skemmtilegt tengt því og horfa síðan á Eurovision. Í kvöld ætla ég svo að syngja eina lagið sem ég kann, Gleðibankann, í Eurovision-partíinu hans Páls Óskars á Nasa," segir hún og hlær.

Helga segir að sér líði afskaplega vel, hún sé í góðu jafnvægi, við fína heilsu og sé afskaplega heppin með fjölskyldu og vini.

„Það er reyndar svolítið blendin tilfinning að verða fimmtug," segir Helga „Ég man þegar ég varð fertug, þá fannst mér það bara vera flott tala og hugsaði lítið um þetta en núna þegar ég er orðin fimmtug er þetta svolítið öðruvísi. Maður fer að finna allar leiðir til að segja að þetta sé besti aldurinn, nú sé besti tíminn fram undan og maður ákveði sjálfur hvort lífið verði skemmtilegt eða ekki. Ef maður ákveður það ekki sjálfur verður allt bara hundleiðinlegt."

Trú orðum sínum er Helga farin að stunda golf og hlakkar til að gera það ævina á enda. Hún notar hvert tækifæri til að spila og er nýkomin úr afmælisgolfferð í útlöndum. Helga segir hlæjandi að það væri nú ekki leiðinlegur dauðdagi að deyja bara hundrað ára á golfvellinum.

Golfið er ekki það eina nýja í lífi hennar heldur er hún orðin amma, þó hún sé raunar mjög upptekin amma.

„Ég kalla mig Ömmu diskó. Ég er enn að spila og syngja diskólögin alveg á fullu og svo er ég líka að fljúga."

Helga er ánægð með lífið og ætlar sér að fara inn í sextugsaldurinn með opnum huga. Hún hefur jafnvel hug á að mennta sig meira. Hún segir að það sé ekkert sem maður geti ekki gert og maður geti alltaf bætt einhverju við sig og orðið að betri manneskju.