Starfstími Alþingis lengdur en þingfundadögum ekki fjölgað

Starfstími Alþingis verður lengdur þannig að það hefur störf í byrjun september en hins vegar verðir þingfundadögum ekki fjölgað. Þetta er meðal þess sem fram kemur í nýju frumvarpi að breytingu á þingsköpum Alþingis sem ætlað er að færa vinnubrögð þingsins nær tíðaranda og tæknibreytingum síðustu ára.

Fram kemur í greinargerð með frumvarpinu að það sé afrakstur starfs sem fram hafi farið á vegum forseta þingsins, forsætisnefndar og formanna þingflokka. Að frumvarpinu standa Sturla Böðvarsson, forseti þingsins, og allir þingflokksformenn á Alþingi nema þingflokksformaður Vinstri grænna.

Samkvæmt frumvarpinu er áfram gert ráð fyrir að þingfundadagar verði um 100 á vetri en hins vegar hefur Alþingi störf í byrjun september. Hins vegar verður samkomudagur nýs þings áfram 1. október og er því hugmyndin að störfin í september verða því framhald þess þings sem sat veturinn áður.

Frumvarpið gerir ráð fyrir að óundirbúnum fyrirspurnartímum verði fjölgað og þá er ætlunin að fækka kvöld- og næturfundum þannig að þeir heyri til undantekninga. Þá á að efla tengsl nefnda og ráðherra með því að ráðherrar kynni að hausti nefndum sem eru á málefnasviði þeirra þau mál sem þeir hyggjast leggja fram á því þingi sem þá er að hefjast.



Þá á að bæta starfsaðstöðu þingmanna eins og fram kom í fréttum Stöðvar 2 í gær. Bent er á að þeim breytingum fylgi allnokkur fjárútlát og verður breytingartillaga lögð fram við 2. umræðu um fjárlagafrumvarpið fyrir árið 2008 til að mæta þeim.

Meðal annars er gert ráð fyrir að ráðnir verði aðstoðarmenn fyrir formenn stjórnarandstöðuflokka sem jafnframt eru alþingismenn. Þeir yrðu nú þrír. Enn fremur eiga þingmenn í landsbyggðarkjördæmunum þremur, Suður-, Norðaustur- og Norðvesturkjördæmi að fá aðstoðarmenn en rætt hefur verið um það allt frá því að kjördæmaskipan var breytt fyrir átta árum.

Miðað við núverandi stöðu er þurfa 22 þingmenn aðstoð og er miðað við að tveir þingmenn deili aðstoðarmanni þannig að þeir verði 11. Það verður hins vegar lagt í hendur fjárlaganefndar og síðar Alþingis að ákveða hversu miklir fjármunir renna til þessa verkefnis.

Þessar breytingar á þingsköpum á að gera fyrir jólahlé þannig að þær komi til framkvæmda strax á vorþingi.