Óviðeigandi að hækka almenn laun

Vilhálmur Egilsson, framkvæmdastjóri Samtaka atvinnulífsins, segir samtökin telja það óviðeigandi við núverandi aðstæður á vinnumarkaðnum, þar sem mjög mikið launaskrið hefur verið, að hækka almenn laun. Nú sé verkefnið að stilla vinnumarkaðinn af. Vilhjálmur var gestur Helgu Arnardóttur í hádegisviðtalinu á Stöð 2.

„Við núverandi aðstæður, þar sem við gætum horft fram á samdrátt á vinnumarkaði, vegna aðstæðna á fjármálamarkaði, hefur ekkert upp á sig að hækka laun, sem eru þegar búin að hækka um þetta 15-20%, um einhverja smá prósentur," segir Vilhjálmur.

Vilhjálmur segir að helsta verkefnið nú sé að ná stöðugleika og halda verðbólgu í skefjum. Vilhjálmur segist vilja hækka lágmarkslaun og ná fram ákveðinni launaþróunartryggingu þannig að þeir sem hafi setið eftir í launaþróuninni fái ákveðna hækkun. „Það er kannski einhver glóra í því að hækka alla í stöðugu hagkerfi þar sem hækkanir eru til að gera nokkuð lágar. En í hagkerfi hjá okkur, þar sem launahækkanir eru út og suður og hækkanir hafa verið langt umfram það sem samið hefur verið um er ekki vitglóra í því að gera það," segir Vilhjálmur.