Dregið úr reykingum um helming síðustu 12 ár

Hlutfall nemenda í 10. bekk sem reykja daglega hér á landi hefur lækkað um nær helming á 12 árum. Þá hefur dregið verulega úr drykkju þeirra á sama tímabili. Þetta eru niðurstöður úr nýrri ESPAD rannsókn sem kynntar voru í dag.

Evrópska vímuefnarannsóknin European School Survey Project on Alcohol and Other Drugs er samvinnuverkefni fræðimanna í rúmlega fjörutíu Evrópulöndum. Rannsóknin byggir á samræmdum mælingum sem fylgjast með breytingum á neyslu tóbaks, áfengis og annarra vímuefna í 10. bekk grunnskóla yfir 12 ára tímabil og á milli landa.

Þegar kemur að reykingum tíundu bekkinga sýna niðurstöður að hlutfall þeirra sem reykja daglega hefur lækkað um nær helming. Árið 1995 reyktu 21% nemenda daglega en í ár reykja 11% daglega. Samkvæmt þessu hlutfalli má gera ráð fyrir að um fimm hundruð nemendur í 10.bekk reyki daglega.

Þá sýna rannsóknir að ölvun unglinga hefur minnkað mikið á síðustu 12 árum. Hlutfall þeirra sem hafa orðið drukknir lækkar úr 64 % árið 1995 í 42 % árið 2007. Frá árinu 1995 til 1999 jókst hassneysla nemenda í 10. bekk grunnskóla verulega . Í ár er hassneysla tíundu bekkinga sú sama og hún var árið 1995. Hlutfall þeirra sem nota hass reglulega minnkar mun hægar en hlutfall þeirra sem einhvern tímann hafa prófað efnið.