Breyttur útivistartími barna og unglinga

Útivistartími barna og unglinga tók breytingum í gær og framvegis mega 12 ára börn og yngri ekki vera úti lengur en til klukkan tíu á kvöldin. Unglingar á aldrinum 13 til 16 ára mega vera úti til klukkan tólf á miðnætti.

Fyrir utan tilgreindan tíma mega börn og unglingar ekki vera á almannafæri nema í fylgd með fullorðnum. Bregða má út af reglunum fyrir síðartalda hópinn þegar unglingar eru á heimleið frá viðurkenndri skóla-, íþrótta-, eða æskulýðssamkomu. Aldur miðast við fæðingarár.

Fram kemur í tilkynningu frá lögreglunni að reglurnar eru samkvæmt barnaverndarlögum og þeim ætlað að tryggja nægan svefn sem er börnum og unglingum nauðsynlegur.