Alltaf hægt að klifra eitthvað

Íslenska alpafélagið verður þrjátíu ára næstkomandi sunnudag.

Í tilefni af afmælinu stendur félagið fyrir ýmsum viðburðum á þessu ári. Á föstudag kemur hingað til lands einn áhrifamesti fjallgöngumaður af sinni kynslóð, Steve House, og mun hann dvelja hér í tæpa viku.

„Þetta er mjög stórt nafn og merkilegur karl. Það eru nokkrir aðilar sem ætla að sjá um hann og sjá til þess að hann fái að kynnast landi og þjóð,“ segir Ágúst Kr. Steinarsson, stjórnarmeðlimur Íslenska alpafélagsins.

Á mánudag heldur House fyrirlestur og myndasýningu um ævintýri sín auk þess sem hann ætlar að fara í fjallgöngur, ísklifur og margt fleira. House hlaut Gullnu ísöxina (Piolet d’Or) árið 2005 ásamt klifurfélaga sínum, Vince Anderson.

Verðlaunin hlutu þeir fyrir að klifra hið hrikalega Rupal fés á Nanga Parbat (8.125 m) í Pakistan án allrar utanaðkomandi aðstoðar. Áherslur House af fjallamennsku einkennast af virðingu fyrir náttúrunni auk þess sem hann leggur áherslu á að ferðast hratt með lítinn farangur og skilja engan búnað eftir á fjallinu.

Að sögn Ágústs eru fimm til sex hundruð manns skráðir í alpafélagið, þar sem áhersla er lögð á jaðarsport á borð við ísklifur, fjallgöngur og skíðamennsku. „Við bjóðum upp á námskeið fyrir okkar félagsmenn í öllum greinum sem falla undir okkar áherslur. Við höldum líka árlegar myndasýningar þar sem við sýnum stuttmyndir af köppum sem eru í þessu sporti,“ segir hann. Ágúst vill ekki meina að klifur sé erfitt sport. „Rétt eins og fólk getur labbað upp tröppur getur fólk alltaf fundið eitthvað til að klifra. Þetta er fyrir alla og fólk finnur bara það sem hentar því.“

Afmælisfjallganga verður haldin á á sunnudag þegar farið verður á Skessuhorn. „Fyrsta ferðin sem var farin í þessu félagi árið 1977 var á þetta fjall. Við ætlum að fjölmenna á afmælisdaginn og það er opið öllum. Við ætlum að reyna að fá merka menn til að vera með leiðsögn og við ætlum að fara mismunandi leiðir og hafa góða fjölbreytni. Þetta verður vonandi mjög skemmtileg ferð.“ Helgina 16. til 18. mars verður síðan haldin Telemark-hátíð á Akureyri þar sem keppti verður í hinum ýmsu greinum. Nánari upplýsingar um Íslenska alpafélagið má finna á isalp.is.