Nærri 60 manns sagt upp hjá Humarvinnslunni í Þorlákshöfn

Stjórn Humarvinnslunnar í Þorlákshöfn hefur ákveðið að segja upp öllu starfsfólki í landvinnslu fyrirtækisins í Þorlákshöfn, alls 59 manns. Ákvörðunin var tilkynnt á fundi með starfsmönnum í dag.

Fram kemur í tilkynningu frá Humarvinnslunni að vegna verkefnaskorts og fyrirsjánlegra versnandi rekstrarskilyrða fyrirtækisins neyðist stjórnin til þess að grípa til þessara aðgerða. Það megi rekja til þess að stórfelldur niðurskurður hafi orðið á þorskveiðiheimildum en það hafi víðtæk áhrif á starfsemi fyrirtækisins og minnkandi hráefni til vinnslu.

„Þessi skerðing nær ekki einungis til hráefnisöflunar fyrirtækisins í þorski heldur eru og verða áhrifin mun víðtækari og mun einnig hafa áhrif á framboð og verðmyndun á öðrum tegundum hráefnis. Þá má búast við að mun minna verði af kvóta á leigumarkaði sem hefur áhrif á framboð hráefnis," segir í tilkynningunni.

Enn fremur kemur fram í tilkynningunni að kvótaskerðingin hafi mikil áhrif á rekstrarafkomu fyrirtækisins til hins verra til framtíðar litið og þá hafi veiðar á flatfiski brugðist þetta haustið, en vinnsla flatfiskafurða hefur verið burðarásinn í framleiðslu fyrirtækisins yfir haustmánuðina. Bregðast hafi þurft við breyttum aðstæðum strax og endurskipulagning sé nauðsynleg.

Humarvinnslan er 15 ára gamalt fyrirtæki sem hefur sérhæft sig í vinnslu og markaðssetningu humars. Auk humarvinnslu hefur fyrirtækið bætt við sig vinnslu á þorski, ýsu og flatfiski og með því skjóta fleiri stoðum undir reksturinn. Hjá fyrirtækinu hafa að jafnaði starfað á bilinu 70-80 starfsmenn til sjós og lands en 25 manns hefur að auki verið bætt við tímabundið á meðan humarvertíð stendur yfir. Starfsstöð Humarvinnslunnar hefur frá stofnun verið í Þorlákshöfn og fyrirtækið verið meðal stærstu atvinnuveitenda í bænum.

Þessi tíðindi þýða að á einum degi hafa nærri 100 manns sem unnið hafa við fiskvinnslu misst vinnuna. Fyrr í dag tilkynnti Eskja á Eskifirði að hún hygðist segja upp 39 stafsmönnum í frystihúsi sínu.