Eskja segir upp nærri 40 manns vegna kvótaniðurskurðar

Sjávarútvegsfyrirtækið Eskja á Eskifirði hefur ákveðið að segja upp öllum starfsmönnum í frystihúsi félagsins, 39 talsins. Ástæðan er niðurskurður á þorskveiðiheimildum sem stjórnvöld kynntu fyrr í sumar.

Að sögn Hauks Björnssonar, framkvæmdastjóra Eskju, hefur niðurskurðurinn á þorskvóta það mikil áhrif á starfsemi fyrirtækisins að hugsanlega verði fiskvinnslu algjörlega hætt í frystihúsinu.

Haukur segir að starfsmönnum hafi verið tilkynnt strax í sumar þegar greint var frá kvótaniðurskurðinum að hugsanlega þyrfti að grípa til einhverra aðgerða hjá fyrirtækinu. Hluti starfsmannanna hafi þegar fundið aðra vinnu og þá verði einhverjum hópi boðin vinna annars staðar hjá fyrirtækinu, til dæmis í bræðslunni, en Eskja hefur veitt mikið af uppsjávarfiski. Þá bendir hann á að fjölmargir starfsmannanna hafi hálfs árs uppsagnarfrest.

Haukur segir að ekki hafi verið tekin endanleg ákvörðun um að hætta allri fiskvinnslu í frystishúsi Eskju en næstu þrír mánuðir verði notaðir til þess að skoða hvort önnur tækifæri séu í stöðunni. Ekki sé ætlunin að selja kvóta félagsins.

Aðspurður um atvinnutækifæri á Eskifirði segir Haukur að með til komu álversins í Reyðarfirði hafi skapast ýmiss konar störf á svæðinu og hann telji að tækifærin séu fleiri en víða annars staðar.