Ákærð fyrir að smygla um 700 grömmum af kókaíni

Tvær konur á fimmtugsaldri og 25 ára gamall karlmaður hafa verið ákærð fyrir innflutning á tæplega 700 grömmum af kókaíni frá Hollandi til Íslands. Talið er að verulegur hluti af efninu hafi verið ætlaður til sölu í ágóðaskyni. Karlmaðurinn afhenti annarri konunni efnin í Amsterdam í því skyni að þau yrðu flutt til Íslands. Hún og hin konan sem ákærð er földu efnin innanklæða og í líkama sínum. Þannig fluttu konurnar inn efnin þann 13. febrúar síðastliðinn. Fyrirtaka var í málinu í Héraðsdómi Reykjaness í morgun.