Kveikti á neyðarblysi inni í skólastofu

Reykræsta þurfti tvær skólastofur í Grunnskólanum í Borgarnesi laust eftir klukkan átta í morgun eftir að átta ára gamall nemandi kveikti fyrir misskilning í neyðarblysi. Blysið höfðu nemendur skólans fundið í fjöruferð sem farin var í gær. Engan sakaði í óhappinu.

„Blysið slæddist með dóti sem krakkarnir tíndu í fjörunni í gær án þess að nokkur tæki eftir því," sagði Kristján Gíslason, skólastjóri Grunnskólans í Borgarnesi, í samtali við Vísi. „Einn nemandi fór að fikta í þessu og þá fylltist allt af reyk."

Slökkvilið Borgarbyggðar var kallað á staðinn til að reykræsta tvær skólastofur sem höfðu fyllst að reyk. Skólinn var rýmdur að hluta. Kristján segir að allt hafi gengið vel fyrir sig og að kennsla hafi hafist að nýju tæpum hálftíma síðar. „Það brugðust allir hárrétt við. Þetta sýnir manni að það er gott að hafa viðbragðsáætlanir."