Randver og Cleese í áramótaauglýsingu Kaupþings

Breski stórleikarinn John Cleese kemur fram í áramótaauglýsingu Kaupþings annað árið í röð. Að þessu sinni verður Cleese þó ekki í aðalhlutverkinu. John Cleese verður aukaleikari við hlið Randvers Þorlákssonar.

„Ég er bundinn trúnaðarskyldu og get ekkert tjáð mig,“ sagði Randver Þorláksson þegar Fréttablaðið spurði hann út í leik sinn með John Cleese. Mikil leynd hefur hvílt yfir verkefninu síðustu vikur og mánuði en smátt og smátt hafa ýmis smáatriði kvisast út. Þannig hefur Fréttablaðið það fyrir víst að auglýsingin hafi verið tekin upp í Los Angeles fyrir skemmstu. Höfundur hennar er Jón Gnarr og var hann viðstaddur tökurnar ásamt öðrum starfsmönnum auglýsingastofunnar EnnEmm. Erlent tökulið sá um upptökurnar.

Auglýsing Kaupþings verður að öllum líkindum frumsýnd í Ríkissjónvarpinu á gamlárskvöld, en sá háttur var hafður á í fyrra þegar Cleese birtist landsmönnum óvænt með Þorstein Guðmundsson sér við hlið. Fréttablaðið greindi í gær frá því að 60 sekúndna auglýsingahlé í miðju Skaupinu væri selt fyrir minnst þrjár milljónir króna. Bloggarinn Ómar R. Valdimarsson fullyrðir að fasteignasalan Remax hafi keypt auglýsingahléið. Lárus Guðmundsson, auglýsingastjóri hjá RÚV, vildi ekki staðfesta þetta við Fréttablaðið í gær.

Þetta hefur verið stormasamt ár hjá Randver Þorlákssyni. Hann var sem kunnugt er rekinn úr Spaugstofunni og var sú ákvörðun nokkuð umdeild. Margir lýstu óánægju með brottreksturinn en Randver hefur staðið keikur eftir. Hann hefur sýnt góða takta sem sjónvarpsmaður á ÍNN, sjónvarpsstöð Ingva Hrafns Jónssonar, og kom fram sem kynnir á tónleikum Ný dönsk í Borgarleikhúsinu. Upprisa Randvers nær svo hápunkti með leik hans á móti John Cleese, enda hefur Spaugstofan alltaf litið á Monty Python sem sín helstu átrúnaðargoð í gríninu.