Hætt við að selja Gagnaveituna

Stjórnarformaður Orkuveitu Reykjavíkur kynnti á stjórnarfundi í dag tillögu um að fallið verði frá fyrri ákvörðun um að leita tilboða í Gagnaveitu Reykjavíkur, áður Lína.net, dótturfélags OR. Í júní síðastliðnum var samþykkt að fela Glitni að verðmeta Gagnaveitu Reykjavíkur og leita eftir tilboðum í hlutafé félagsins. Verðmat var fengið en sölumeðferð hefur ekki hafist. Bryndís Hlöðversdóttir, stjórnarformaður OR segir að hún líti á Gagnaveituna sem grunnþjónustu sem falli vel að annari veitustarfsemi.

Búist er við því að tillagan verði samþykkt á næsta stjórnarfundi.

Í greinargerð með tillögunni segir að núverandi meirihluti sé andvígur sölu fyrirtækisins og nauðsynlegt sé að taka ákvörðun um að hætta undirbúningi sölu til þess að eyða óvissu jafnt meðal starfsmanna, viðskiptavina sem og þjónustuaðila.

„Það er skoðun mín að starfsemi Gagnaveitunnar sé grunnþjónusta og falli afar vel að annarri veitustarfsemi Orkuveitunnar," segir Bryndís Hlöðversdóttir stjórnarformaður Orkuveitunnar. „Áætlanir sýna að rekstarhorfur eru góðar og það mat sem gert var á verðmæti fyrirtækisins í vor gefur til kynna að verðmætið aukist til muna á næstu árum og verulega umfram þá fjárfestingu sem framundan er," segir Bryndís.