Vilja friðargæsluliða heim frá Afganistan

Fjórir þingmenn Vinstri - grænna hafa lagt fram þingsályktunartillögu þess efnis að Alþingi feli utanríkisráðherra að kalla heim íslenska friðargæsluliða í Afganistan, sem þar starfa sem hluti liðsafla NATO.

Jafnframt verði þátttaka Íslands í friðargæslu og verkefnaval endurskipulagt í samræmi við markmið nýrra laga um íslensku friðargæsluna. Enn fremur að utanríkisráðherra vinni að þeirri endurskipulagningu í nánu samráði við utanríkismálanefnd Alþingis.

Í greinargerð með tillögunni er bent á að ekki sé ætlunin að fella neina dóma um þau störf sem íslenskir friðargæsluliðar hafa innt af hendi í Afganistan undanfarin ár en nú starfa þar um 15 manns. Tillagan byggist hins vegar á þeirri skoðun að forsendur fyrir dvöl íslensku friðargæslunnar í Afganistan verði að teljast lagalega afar hæpnar með tilliti til anda og markmiða nýrra laga um íslensku friðargæsluna.

Íslenskir friðargæsluliðar starfi þar að verkefnum sem stjórnað er af Atlanshafsbandalaginu og beri a.m.k. sumir hverjir starfstitla í samræmi við hernaðarskipulag NATO. Átök fari nú harðnandi í Afganistan milli hersveita NATO og skæruliða talibana og fjöldi óbreyttra borgara sem fallið hafi í átökunum, einkum í loftárásum NATO, skipti þúsundum og aukist eftir því sem líður á stríðið. Loftárásirnar virðist koma að litlu gagni og ekki ná að binda endi á ófriðinn í landinu.

Þá segir í greinargerðinni að NATO sé komið út í mikla ófæru í Afganistan sem eins konar upphreinsunardeild fyrir Bandaríkjamenn. Betra en ekki væri að draga íslensku friðargæsluliðana strax út úr samstarfinu við NATO og færa liðsaflann t.d. undir stjórn Sameinuðu þjóðanna í landinu. Langheppilegast væri þó að kalla einfaldlega liðsaflann heim, eins og tillagan geri ráð fyrir, og endurskipuleggja í framhaldinu alla framgöngu Íslands og verkefnaval á þessu sviði.