Alfreð fékk rúm 500 þúsund á mánuði

Heildarlaun Alfreðs Þorsteinssonar, fyrrverandi borgarfulltrúa Framsóknarflokksins, fyrir formennsku í nefnd um byggingu nýs hátæknisjúkrahúss voru 511 þúsund á mánuði, samkvæmt upplýsingum frá Heilbrigðisráðuneytinu. Inni í þessum tölum er ekki bílastyrkur sem Alfreð fékk.

Jón Kristjánsson heilbrigðisráðherra skipaði nefndina fyrir tveimur árum síðan. Þá var ákveðið að Alfreð Þorsteinsson myndi veita henni formennsku. Guðlaugur Þór Þórðarson heilbrigðisráðherra lagði svo nefndina niður nú í haust vegna skipulagsbreytinga. Nefndin starfaði því í tæp tvö ár.

Nú hefur Inga Jóna Þórðardóttir tekið við formennsku í nefnd um fasteignir Landspítalans en ekki hefur verið tekin ákvörðun um kjör hennar, samkvæmt svari heilbrigðisráðuneytisins við fyrirspurn Vísis.