Ráða verkefnastjóra vegna tilfærslu verkefna

Velferðarsvið Reykjavíkurborgar hefur ráðið sérstakan verkefnastjóra til að vinna að færslu verkefna á sviði málefna fatlaðra frá ríki til Reykjavíkurborgar.

Eftir því sem segir í tilkynningu frá sviðinu gefast með slíkri tilfærslu betri tækifæri til að samþætta enn frekar þjónustu við fatlaða. Notendur komast nær þjónustunni og fá meiri tækifæri til að hafa áhrif á hana. Reynsla af slíkum tilflutningi hafi enn fremur leitt í ljós að þjónustan verði sveigjanlegri. Segist velferðarsvið með þessu leggja sitt af mörkum til þess að flýta fyrir og standa sem best að verkefnaflutningnum.

Jóna Rut Guðmundsdóttir, sálfræðingur og félagsráðgjafi, hefur verið ráðin til verkefnisins. Hún hefur stýrt uppbyggingu á sviði búsetuendurhæfingar geðfatlaðra hjá Reykjavíkurborg að undanförnu. Þá hefur Jóna Rut margra ára reynslu á sviði fjölskyldumeðferðar og kennslu bæði hjá Háskóla Íslands og Háskólanum í Reykjavík.