Segja allt eins líklegt að jarðskjálftahrinur verði nærri byggð

Almannavarnardeild segir töluverðar líkur á því að jarðskjálftavirkni á svokölluðu vestara gosbelti muni halda áfram á næstunni og allt eins líklegt að nýjar hrinur geti orðið nærri byggð. Þetta kemur fram í tilkynningu frá almannavörnum.

Þar er bent á að undanfarið hafi verið nokkur jarðskjálftavirkni á gosbeltinu en það nær frá Reykjanesskaga og norður fyrir Langjökul. Í liðinni viku var hrina jarðskjálfta við Selfoss og nú stendur yfir hrina við norðanverðan Langjökul. Stærsti skjálftinn sem mældist í nótt og morgun norðvestan við Hveravelli var um þrír á Richter.

Almannavarnir hvetja almenning til þess að kynna sér leiðbeiningar um fyrirbyggjandi aðgerðir vegna jarðskjálfta, svo sem að festa húsgögn og forðast að hafa þunga muni í hillum, einkum yfir rúmum og stöðum þar sem fólk situr að jafnaði.