Ekki gripið til sérstakra ráðstafana vegna rússneskra kafbáta

Ekki verður gripið til sérstakra ráðstafana hér á landi vegna aukinna ferða rússneskra kafbáta við Noregsstrendur að sögn utanríkisráðherra. Ráðherra segist ekki vita til þess að rússneskir kafbátar hafi verið á ferð undan ströndum Íslands.

Norskir fjölmiðlar greindu frá því fyrir skemmmstu að ferðum rússneskra kafbáta undan ströndum Noregs hafi fjölgað. Haft er eftir talsmanni norska varnarmálaráðuneytisins að með þessu séu Rússar að minna á hernaðarmátt sinn á Norðurslóðum.

Bandaríska herstöðin á Miðnesheiði gengdi mikilvægu hlutverki við kafbátareftirlit á Norður-Atlantshafi og var hér jafnan staðsett heil flugsveit af Orion-kafbátarleitarvélum á vegum NATO.

Ingibjörg Sólrún Gísladóttir utanríkisráðherra segir að ekki hafi verið gripið sérstakra ráðtafana hér á landi vegna ferða Rússa við Noregsstrendur.

Ingibjörg segist ekki búast við því að eftirlit með kafbátarferðum á hafsvæðunum í kringum Ísland verði aukið. Unnið sé á vettvangi NATO og þar sé alltaf verið að fara yfir þessi mál.