Flutningaskipið Axel gengur fyrir eigin vélarafli

Flutningaskipið Axel sem strandaði á Borgeyjarboða fyrir utan Höfn í Hornafirði upp úr klukkan átta í morgun er laust af skerinu.

Þá hefur áhöfninni tekist að koma aðalvélinni í gang og er stefnt að því að sigla skipinu til Djúpavogs og láta kafara kanna skemmdir á botni þess.

Einhver olía lak úr skipinu og fóru björgunarsveitarmenn frá Höfn á vettvang með flotgirðingu til að girða olíuflekkinn af. Hann reyndist mun minni en óttast var í fyrstu. Þá lak sjór inn í bógskrúfurými skipsins en því var lokað af.

Ekki liggur fyrir hvort einhver sjór hefur komist í lestina en skipið er fulllestað af frosnum fiski. Við strandið drapst á aðalvélinni og og var þá til öryggis komið taug á milli lóðsbátsins frá Höfn og skipsins en ekki eru lengur not fyrir hana. Þá er varðskip á leið á staðinn til að fylgja skipinu til Djúpavogs.

Engan úr ellefu manna áhöfn sakaði en skipstjórinn er íslenskur og aðrir frá Austur-Evrópu. Skipið var nýfarið frá Hornafirði áleiðis til Póllands þegar það strandaði. Engar upplýsingar hafa fengist um tildrög strandsins. Þá er ekki ljóst hvort það drapst á aðalvélinni áður en skipið strandaði eða þegar það gerðist.

Axel, sem er í eigu íslensks skipafélags, Dreggs á Akureyri, hefur að undanförnu verið í ferðum á milli Íslands og meginlands Evrópu og gjarnan siglt beint á hinar ýmsu hafnir umhverfis landið og á milli þeirra.