Varað við lúmskri hálku á götum og gangstéttum

Sjóvá Forvarnahúsið varar við mjög lúmskri hálku á götum og gangstéttum á höfuðborgarsvæðinu í dag.

Í tilkynningu frá húsinu segir að þegar hafi borist nokkrar tilkynningar um hálkuslys. Gangandi vegfarendur eru beðnir um að fara að öllu með gát og taka fram mannbrodda ef þeir eiga.

Þá eru fyrirtæki og verslanir hvött til að sinna hálkuvörnum fyrir utan fyrirtæki sín. Enn fremur hvetur Sjóvá Forvarnarhús ökumenn til að aka í samræmi við aðstæður en nokkuð hefur verið um að bílar hafi verið að renna saman á bílastæðum í hálkunni.