Snoop Dogg dæmdur fyrir vopnavörslu

Rapparinn Snoop Dogg játaði sig í gær sekan af ákæru um að hafa haft hættuleg vopn undir höndum. Hann var dæmdur í  þriggja ára skilorðsbundið fangelsi og til að gegna 160 klukkustunda samfélagsþjónustu.

Snoop Dogg var handtekinn í september 2006 eftir að kylfa fannst í tösku hans á John Wayne flugvellinum í Orange Country. Yfirvöld sögðu að um hættulegt vopn væri að ræða en hann sagðist sjálfur ætla að nota það í myndband sem hann hugðist taka upp í New York.

Talsmaður rapparans, Donald Etra, segir að dómurinn verði mildaður ef Snoop brýtur ekki lögin næsta árið. „Við erum mjög ánægð með niðurstöðuna. Markmið Snoop's er að búa til tónlist en ekki að koma fyrir rétt."

Rapparinn hefur áður komist í kast við lögin og þá sérstaklega á tíunda áratugnum. Hann hefur þó verið tiltölulega löghlýðin hin síðari ár ef frá er talin fimm ára skilorðsbundinn dómur sem hann fékk fyrir vörslu skotvopna og marijuana í apríl síðastliðinn.