Lífverðir Leonardo DiCaprio handteknir

Tveir lífvarða Íslandsvinarins Leonardo DiCaprio voru handteknir í Jerúsalem eftir að hafa lent í átökum við ljósmyndara sem vildu ná mynd af leikaranum. Leonardo dvaldi hér á landi í síðustu viku en er nú staddur í Ísrael, heimalandi kærustu sinnar, fyrirsætunnar Bar Rafaeli.

Ísraelskir fjölmiðlar hafa ekki látið parið vera eftir að það kom til landsins á sunnudag. Samkvæmt heimildum BBC kom til átaka milli milli lífvarða Leonardos og ljósmyndara. Einn ljósmyndarinn meiddist í átökunum sem lyktaði með því að tveir lífverðir kvikmyndastjörnunnar voru færðir í varðhald. Það er því ekki sama sveitasælan og hérlendis en leikarinn var í ljósmyndatökum við Jökulsárlón fyrir tímaritið Vanity Fair.