Leonardo á fleygiferð um heiminn

Hún varð heldur stutt ferðin hjá bandaríska stórleikaranum Leonardo DiCaprio og kærustu hans, fyrirsætunni Bar Refaeli, hingað til Íslands í síðustu viku.

Eins og fram kom í Fréttablaðinu á laugardaginn lenti leikarinn í skjóli nætur aðfaranótt föstudags á Reykjavíkurflugvelli, svaf ferðaþreytuna úr sér og hélt strax um morguninn út á Jökulsárlón þar sem Annie Leibovitz tók myndir fyrir glanstímaritið Vanity Fair.

„Upphaflega ætlaði hann að vera yfir helgina en vegna fjölskylduaðstæðna dreif hann sig af landi brott strax á föstudagskvöldinu," segir Finnur Jóhannsson, framleiðandi hjá True North, sem aðstoðaði tökuliðið frá Bandaríkjunum og sá um að allt væri eins og best yrði á kosið fyrir stórstjörnuna.

„En tökurnar gengu alveg rosalega vel og alveg að óskum. Ef allt fer samkvæmt áætlun ættu myndirnar að birtast annað hvort í apríl- eða maíheftinu," bætir Finnur við og segir DiCaprio hafa verið dreng góðan og lausan við alla stjörnustæla.

DiCaprio flaug ásamt Refaeli til Frankfurt, þar sem skötuhjúin höfðu stutta viðkomu, en þau voru síðan komin til Tel Aviv í Ísrael strax á mánudagsmorgun. Er þetta í fyrsta sinn sem DiCaprio hittir foreldra fyrirsætunnar en hann hafði áður verið í sambandi við brasilíska ofurmódelið Gisele Bündchen.

Vafalítið hefur parinu verið hugsað til kyrrðarinnar við lónið fyrir austan því mikið fjölmiðlafár greip Ísraela þegar kvisaðist út að Titanic-stjarnan væri mætt til landsins. Fjöldi ljósmyndara beið þeirra á flugvellinum og þyrlur sveimuðu fyrir ofan hús foreldra fyrirsætunnar í von um að geta smellt heimkomuna á mynd. Refaeli er heimsfræg í heimalandi sínu og varð fyrsta ísraelska konan til að birtast á síðum baðfatablaðs Sports Illustrated.