Van Halen í meðferð

Eddie Van Halen, gítarleikari hljómsveitarinnar Van Halen, er á leiðinni í áfengismeðferð. Svo gæti farið að fyrirhugaðri tónleikaferð sveitarinnar um Norður Ameríku verði frestað af þessum sökum. Fyrrum söngvari Van Halen, David Lee Roth, hefur þegar samþykkt að taka þátt í tónleikaferðinni. „Þessa stundina finnst mér ég ekki geta lagt mig allan fram fyrir ykkur,“ sagði Eddie í yfirlýsingu til aðdáenda sinna. Eddie, sem er 52 ára, hefur lengi átt við áfengisvandamál að stríða.