Ásókn í byggingarland bitnar á græna treflinum

Skógræktarmenn hafa áhyggjur af ásókn Reykjavíkurborgar og nágrannasveitarfélaga í að taka skógræktarlönd höfuðborgarsvæðisins undir byggingarland. Þeir óttast að græni trefilinn svokallaði verði götóttur og hafa tekið upp viðræður við sveitarfélögin um að hann njóti friðhelgi.

Hvarvetna í útjaðri byggðarinnar má nú sjá trjágróður vaxa upp . Bara á síðustu fimmtán árum er áætlað að fimm til sjö milljónir trjáa hafa verið gróðursettar í nágrenni Reykjavíkur. Skógræktarfélögin á höfuðborgarsvæðinu í samvinnu við sveitarfélögin hafa markvisst unnið að því allt frá árinu 1990 að klæða landið umhverfis byggðina skógi og hefur verkefnið verið nefnt Græni trefillinn.

Stórt svæði var tekið frá og síðan byrjað að gróðursetja. Skógræktarmenn dreymir um að há tré eins og nú hafa vaxið upp í Heiðmörk myndi trefillinn umhverfis byggðina. Hætt er við því að trefilinn verði götóttur, miðað við ásókn í nýtt byggingarland. Þannig áformar Reykjavíkurborg nú að taka svæði á Hólmsheiði vestan Geitháls undir atvinnulóðir en þar er trjáagróður þegar orðinn áberandi.

Í Úlfarsfellslandi eru framkvæmdir þegar hafnar við ný íbúðahverfi en þetta land hafði áður verið skilgreint sem hluti af græna treflinum. Framkvæmdastjóri Skógræktarfélags Íslands, Brynjólfur Jónsson, segir að nær öll sveitarfélög höfuðborgarsvæðisins séu nú að sækja inn í græna treflinn til að fá byggingarland. Af því hafi skógræktarmenn verulegar áhyggjur og menn þurfi að taka sig verulegu taki til að breyta þessu þannig að öll útivist njóti góðs af í framtíðinni.

Að ósk skógræktarmanna eru viðræður hafnar við Samtök sveitarfélaga á höfuðborgarsvæðinu um að verja trefilinn sem Brynjólfur telur mikilvægan fyrir lýðheilsu. Hann þurfi að njóta friðhelgi þannig að útivistin í framtíðinni verði í fyrirrúmi og þurfi ekki að gjalda þess að menn sjái ekki nógu langt fram í tímann.

Brynjólfur segist þó vel geta séð byggð að hluta innan græna trefilsins en bendir um leið á að menn geti unnið ný ræktarlönd og stækkað trefillinn upp á Mosfellsheiði, upp á Sandskeið og langt upp fyrir Hafnarfjörð.