Gripinn við vélsleðaakstur innanbæjar án réttinda

Vélsleðamaður á Akranesi reyndi á sunnudag að stinga lögreglu af eftir að kvartað hafði verið undan akstri hans í bænum. Lögregla hafði svipast um eftir sleðamanninum eftir kvörtunina og fann hann loks eftir nokkra leit.

Lögreglumenn gáfu ökumanni merki um að stöðva sleðann sem hann gerði en þegar átti að fara að ræða við hann ók hann á braut og hvarf sjónum lögreglumanna. Hann fannst þó aftur skömmu síðar og í það skipti reyndi hann ekki að stinga af.

Athugun lögreglu leiddi í ljós að sleðinn var óskráður og ökumaður réttindalaus. Ökumaðurinn þverbraut því umferðarlög með því að aka án ökuréttinda á óskráðu og ótryggðu ökutæki og að hafa ekki farið að fyrirmælum lögreglu. Til viðbótar telst hann hafa brotið gegn lögreglusamþykkt fyrir Akraneskaupstað sem bannar umferð vélsleða innan bæjarmarkanna.

Þetta er í sjöunda sinn að sögn lögreglu sem maðurinn er staðinn að því að aka réttindalaus en hann hefur aldrei öðlast ökuréttindi.