Þjóðhagsspá: Atvinnuleysi eykst og verðbólga 3,8% árið 2007

Í nýrri endurskoðaðri þjóðhagsspá Fjármálaráðuneytisins er gert ráð fyrir að atvinnuleysi á árinu 2007 verði 3,3% en það var 1,3% á árinu 2006. Áætlað er að viðskiptahallinn á síðasta ári hafi verið 22,4% af landsframleiðslu. Verulega á þó að draga úr honum í ár samkvæmt spánni og verður hann 14,5% af landsframleiðslu.

Búist er við því að draga taki úr verðbólgu og að hún nemi 3,8% að meðaltali á árinu 2007 en hún var 6,8% milli áranna 2005 til 2006. Gert er ráð fyrir að það dragi úr hagvexti og hann verði 2,2% á árinu en hann var 2,5% á síðasta ári. Áætlað er að kaupmáttur hafi aukist um 5,2% á árinu 2006 og haldi áfram að aukast á þessu ári um 4,6%.