Munu fella lögin um RÚV úr gildi

22. janúar 2007 18:30

Stjórnarandstaðan gafst upp í óvinsælu andófi sínu gegn frumvarpi um Ríkisútvarpið, að mati menntamálaráðherra, en stjórnarandstaðan hætti óvænt umræðum um frumvarpið í morgun. Forystumenn stjórnarandstöðunnar segja hana einhuga um að standa vörð um Ríkisútvarpið og að hún muni fella lögin úr gildi, fái hún til þess meirihluta á Alþingi að loknum kosningum í vor.

Það lá í loftinu fyrir helgi að stjórnarandstaðan ætlaði sér að ræða frumvarp ríkisstjórnarinnar um Ríkisútvarpið út alla þessa viku, eftir rúmlega eitt hundrað klukkustunda umræður þar á undan. Stjórnarandstaðan boðaði hins vegar óvænt til blaðamannafundar í morgun, þar sem hún tilkynnti að umræðum um frumvarið yrði hætt að hennar hálfu þá þegar. Jafnframt kynnti stjórnarandstaðan sameiginlega yfirlýsingu með sex áhersluatriðum um hvernig hún vill sjá framtíð Ríkisútvarpsins og boðaði að nái hún meirihluta á Alþingi eftir kosningar, muni hún tafarlaust breyta væntanlegum lögum. Stjórnarandstaðan vill ekki að Ríkisútvarpið verði gert að hlutafélagi í eigu ríkisins, vill styrkja menningarlegt hlutverk þess og tryggja því tekjur úr ríkissjóði, sértekjum og auglýsingatekjum. Steingrímur J Sigfússon, formaður Vinstri grænna, segir stjórnarandstöðuna ekki hafa gefist upp gegn stjórnarliðum. Hún hafi ítrekað reynt að ná sáttum um málið.

"En því miður hefur ríkisstjórnin ekki virt slíkar sáttatilraunir viðlitis. Við metum það svo að það sé full reynt og það þjóni ekki tilgangi að halda þessum bardaga áfram," sagði Steingrímur J. Sigfússon formaður Vinstri grænna í morgun. Stjórnarandstaðan sætti sig nú við að málið fari í atkvæðagreiðslu. Stjórnarandstaðan flytji breytingatillögu við frumvarpið sem gæti enn afstýrt því versta, það er að segja að fresta gildistöku laganna. Lengra hafi ekki verið komist.

Ingibjörg Sólrún Gísladóttir formaður Samfylkingarinnar segir það vekja athygli að árið 2004 hafi verið mikil og langvinn deila á þinginu um aðra fjölmiðla. "Þegar upp var staðið komust menn auðvitað að því að það var miklu meiri sátt meðal þingmanna um það mál en umræðan gaf til kynna. Það var skipuð fjölmiðlanefnd og hún komst að niðurstöðu og nú má segja að almennt sammæli ríki um allan fjölmiðlamarkaðinn, en ekki um ríkisútvarpið. Og það auðvitað hlýtur að gera það að verkum að það dregur úr trausti á ríukisútvarpinu.

"Ég sé það ekki fyrir mér sem hlutafélag, ég sé það fyrir mér sem stofnun sem ríkið á og rekur og almenningur á tilkall til," segir Guðjón A. Kristjánsson formaður Frjálslynda flokksins.

Þorgerður Katrín Gunnarsdóttir menntamálaráðherra gefur ekki mikið fyrir yfirlýsingar stjórnarandstöðunnar um að hún muni breyta lögunum um Ríkisútvarpið fái hún til þess meirihluta að loknum kosningum.

"Þetta er einfaldlega uppgjöf að hálfu stjórnarandstöðunnar. Það er alveg ljóst," segir menntamálaráðherra. Eftir að hafa hlustað á vel flestar ræður stjórnarandstöðuþingmanna um málið sé ljóst að hún tali ekki einum rómi um málið.

"Hún var margradda í þessu máli. En fyrst og síðast hefur stjórnarandstaðan væntanlega áttað sig á því yfir helgina að hún var ekki í takt við þjóðarsálina í þessu máli heldur," segir menntamálaráðherra. Sér finnist þetta vera ákveðin tækifærismennska hjá stjórnarandstöðunni sem kannski hjálpi upp á sálina hjá henni.Það sé greinilegt að ef þessir flokkar komast í stjórn muni þeir afturkalla lögin, en þeir muni ekki gera það með stuðningi Sjálfstæðisflokksins.

Mest lesið

Fleiri fréttir