Atkvæði líklega greidd um RÚV-frumvarpið á morgun

Atkvæðagreiðsla um frumvarp menntamálaráðherra um Ríkisútvarpið ohf. verður að líkindum ekki í dag heldur á þingfundi á morgun. Þriðja umræða um frumvarpið hófst fyrir viku og stóð með látum fram á föstudag þar sem stjórn og stjórnarandstaða deildu hart og stjórnarandstöðuþingmenn töluðu lengi.

Þriðja umræða hófst svo aftur í morgun en lauk skyndilega þegar tilkynnt var að stjórnarandstaðan hygðist ekki tjá sig meira um frumvarpið en nema lögin um Ríkisútvarpið ohf. úr gildi ef hún fengi til þess stuðning í þingkosningum í vor.

Þingstörf færast með þessari ákvörðun í eðlilegt horf og hefur fundur verið boðaður nú klukkan þrjú þar sem dómsmálaráðherra mælir fyrir fjórum frumvörpum.