Viðgerð á CANTAT-3 frestast vegna óveðurs

Viðgerð á CANTAT-3 sæstrengnum sem gera átti við nú seinni hluta mánaðarins hefur verið frestað og er viðgerðarskipið Pacific Guardian á leið til heimahafnar í Bermúda. Fram kemur í tilkynningu að skipið hafi komið á bilunarstað fyrir viku en að vegna slæms veðurs og sjólags hefur ekki gefist tækifæri til að hefja viðgerð á strengnum.

Veðurútlitið er ekki gott og í ljósi þess var sú ákvörðun tekin að fresta viðgerð á sæstrengnum að sinni eins og segir í tilkynningu en upphaflegar áætlanir gerður ráð fyrir að viðgerðinni yrði lokið í dag.

Strengurinn, sem tengir Ísland við Evrópu, var gangsettur að nýju 18. janúar og er vonast til að fjarskiptaumferð til Evrópu verði með eðlilegum hætti þar til tækifæri gefst til viðgerðar. Ekki liggur fyrir hvenær það verður.