Kaldrifjað glæpaverk í Þorlákshöfn

Flest bendir til að eldsvoði í parhúsi í Þorlákshöfn á laugardagsmorgun hafi verið liður í kaldrifjuðu glæpaverki. Tvennt hefur verið úrskurðað í gærluvarðhald vegna rannsóknarinnar. Karlmaður var úrskurðaður í gæsluvarðhald í gær eftir að hann var handtekinn í Reykjavík þar sem hann var að nota greiðslukort eiganda hússins.

Í gærkvöldi var svo sambýliskona hans úrskurðuð í gæsluvarðhald eftir að þýfi úr brunna húsinu fannst í fórum hennar. Dómari tekur í dag afstöðu til kröfu lögreglu um gæsluvarðhald yfir þriðja manninum, sem er í haldi lögreglu vegna rannsóknarinnar. Menn frá rannsóknardeild lögreglunnar í Reykjavík eru nú á vettvangi til að reyna að finna eldsupptök, en engin vísbending hefur fundist um að kviknað hafi í út frá rafmagni eða raftæki, ekkert annað ljósmeti var í húsinu og eigandinn úti á sjó.

Athygli vekur að engin tengsl voru með húseigandanum og afbrotafólkinu þannig að vaxandi grunur er um að fólkið hafi sigtað út mannlaust hús, látið greipar sópa og kveikt svo í til að eyða sönnunargögnum. En með því ógnaði það í leiðinni lífi og limum konu og barna í áföstu húsi.