Tæplega 30 milljarðar á höfuðborgarsvæðið

Um tuttugu og átta milljarðar fara í vegaframkvæmdir í Reykjavík og nágrenni samkvæmt samgönguáætlun sem lögð verður fyrir Alþingi eftir helgina. Fjármunir verða tryggðir svo hægt verði að lengja flugbrautina á Akureyri þannig að farþegaþotur geti tekið þar á loft fullfermdar.

Stjórnarandstöðuna klæjar í fingurna að fá að fletta samgönguáætlun til næstu fjögurra ára og ýta fast á samgönguráðherra að skila henni til umræðu á Alþingi. Samkvæmt heimildum fréttastofunnar fara lang hæstu fjárframlögin til framkvæmda í Norðvesturkjördæmi. Tæpir fjórir milljarðar fara í jarðgöng milli Bolungarvíkur og Ísafjarðar, stefnt er að því að klára að malbika veginn um Ísafjarðardjúp á næstu fjórum árum og ráðist verður í lagningu nýs vegar um hluta Barðastrandar.

Og Reykjavík og nágrenni fá líka sitt því áætlað er að setja um 28 milljarða í vegaframkvæmdir á höfuðborgarsvæðinu á næstu fjórum árum. Ein þeirra stórframkvæmda sem ráðist verður í er lagning mislægra gatnamóta við Miklubraut og Kringlumýrarbraut.

Þá verður lagt fjármagn í gerð Sundabrautar sem verður mjög stór og mikil framkvæmd. Í samgönguáætlun er líka gert ráð fyrir að breikka allar helstu leiðir út úr höfuðborginni, við Vesturlandsveg og Suðurlandsveg. Samkvæmt heimildum fréttastofunnar geta þeir Sunnlendingar sem vilja að farin verði svo kölluð 2 + 2 leið við breikkun Suðurlandsvegar andað rólega, því gert er ráð fyrir að sú leið verði farin.

Þá geta þeir sem þrýst hafa á lengingu flugbrautarinnar á Akureyri tekið gleði sína, því fjármagn er tryggt í það verkefni, en þar hafa stórar þotur ekki getað tekið á loft fullfermdar vegna þess að flugbrautin er ekki nægjanlega löng. Samgönguáætlun verður að öllum líkindum lögð fyrir Alþingi á mánudag.