Soldáninn af Brunei fjórfalt ríkari en Björgólfur Thór

Forbes tímaritið hefur gefið út lista yfir ríkasta kóngafólk heims. Þar trónir efst soldáninn af Brunei, Haji Hassanal Bolkiah, en auðævi hans eru metin á um 1440 milljarða íslenskra króna og hafa þau gengið í arf í um 600 ár. Til samanburðar þá eru auðævi Björgólfs Thórs Björgólfssonar metin á um 315 milljarða og er soldáninn því rúmlega fjórfalt ríkari.

Aðrir á listanum eru til að mynda konungur Saudi Arabíu, Abdullah Bin Abdulaziz. Hann er í þriðja sæti með um 1224 milljarða. Sjeik Mohammed Bin Rashid Al Maktoum í Dubai er í fjórða sæti með 1032 milljarða og konungur Tælands, Bhumibol Adulyadej, er í því fimmta með um 324 milljarða.

Elísabetu Englandsdrottningu er að finna í 38. sæti með um 38 milljarða en danska konungsfjölskyldan kemst ekki einu sinni á blað.