Fór fram á sex vikna gæsluvarðhald yfir hnífamanni

Lögreglan á höfuðborgarsvæðinu fór í dag fram á það að maðurinn sem stakk annan mann með eldhúshnífi í húsi við Hátún í gærkvöld yrði úrskurðaður í gæsluvarðhald í sex vikur. Að sögn lögreglu hefur maðurinn játað að hafa stungið fórnarlamb sitt en lítið er um skýringar á því háttarlagi.

Mennirnir sátu að sumbli ásamt þremur öðrum í húsinu þegar eitthvað slettist upp á vinskapinn og sótti árásarmaðurinn hníf og stakk hinn án frekari orðalenginga.

 Maðurinn, sem var stunginn, var fluttur í skyndingu á slysadeild þar sem læknum tókst að stöðva blæðingar en hann hafði misst mikið blóð þegar þangað var komið. Líðan hans er þannig að hann er að líkindum úr lífshættu.