Dagbækur Önnu Nicole til sölu á eBay

Einkaeigur Önnu Nicole Smith heitinnar ganga nú kaupum og sölum á netinu. Tvær handskrifaðar dagbækur stjörnunnar eru til sölu á vefsíðunni eBay og hefur þýskur kaupsýslumaður frá Hamborg boðið 512.500 dollara í bækurnar en það er jafngildi rúmra 34 milljóna íslenskra króna. Þetta kemur fram á fréttavef TMZ.

Voru dagbækurnar skrifaðar á árunum 1992 til 1994. Samkvæmt talsmanni seljanda bókanna, Universal Rarities, er þýski kaupsýslumaðurinn mikill aðdáandi fyrrum Playboy kanínunnar en vill ekki láta nafn síns getið. Skákaði hann boðum sem bárust alls staðar að úr heiminum, meðal annars frá Bandaríkjunum, Bretlandi og Bahamaeyjum, en þar bjó Anna Nicole til dauðadags.