Law lendir við áttunda mann í kvöld

Breski leikarinn Jude Law lendir í kvöld á Keflavíkurflugvelli ásamt átta manna hópi samkvæmt heimildum Fréttablaðsins. Töluverður undirbúningur liggur að baki þessarar ferðar leikarans hingað en Law og vinir ætla að taka næturlífið með trompi og skoða allar helstu náttúruperlurnar í nágrenni höfuðborgarsvæðisins.

Samkvæmt upplýsingum Fréttablaðsins hefur hópurinn þegar pantað sér herbergi á 101 hótel við Hverfisgötuna og þaðan ætla þeir að leggja af stað út í næturlíf höfuðborgarinnar. Vitað er að hópurinn hefur hug á því að kynna sér einn vinsælasta stað borgarinnar, Óliver, og er ekki útilokað að Law og vinir leggi hann undir sig um helgina enda hefur Óliver verið vinsæll meðal Hollywood-stjarnanna sem hingað koma. Og er þar skemmst að minnast leikhópsins úr Flags of our Fathers sem voru fastagestir þar.

Einkalíf Jude Law hefur verið töluvert í sviðsljósinu eftir að hann sagði skilið við Siennu Miller. Leikarinn hefur verið orðaður við ófáar yngismeyjarnar, þar á meðal Höllu Vilhjálmsdóttur og bandarísku glamúrgelluna Lindsay Lohan.

Eins og kemur fram í Sirkus, fylgiblaði Fréttablaðsins, hefur Unnur Birna afþakkað dómarastarf í Herra Heimi í Kína vegna anna í námi. Eins og greint var frá í fjölmiðlum hugðist forsetafrúin Dorrit Moussaieff kynna góðvin sinn Law fyrir fegurðardrottningunni yfir kvöldverði á Bessastöðum síðast þegar Law var hér á landi en það datt upp fyrir vegna anna hjá forsetaembættinu. Ekki er vitað hvort Dorrit ætlar að reyna aftur en forsetahjónin ku vera á landinu að þessu sinni.