Fóru á Ólympíuleika pitsubakara

Jakob H. Magnússon og Valgerður Jóhannsdóttir, eigendur Hornsins, voru dómarar í fyrstu Ólympíuleikunum í pitsugerð sem haldnir voru á Ítalíu í síðustu viku. Ólöf, dóttir þeirra hjóna, og Mummi, sem hefur starfað sem pitsubakari á Horninu í um sjö ár, kepptu fyrir hönd Íslands á mótinu. Þau skutu ríkjandi Norðurlandameistara ref fyrir rass, og stefna á að taka þátt í komandi keppnum í Skandinavíu.

Jakob er alþjóðlegur prófdómari í matargerð og hafa þau hjón þrívegis farið til Moskvu til að dæma í slíkum keppnum. Þar kynntust þau strákum sem leggja stund á freestyle-pitsugerð - sem einmitt var keppt í á Ítalíu. „Þeir komust að því að við áttum pitsustað á Íslandi og spurðu hvort við vildum vera prófdómarar á þessum Ólympíuleikum. Því fylgdi að við ættum að koma með keppendur," sagði Valgerður.

Freestyle-keppnin vakti þó mesta athygli ferðalanganna. „Ameríkaninn sem vann var með fótbolta á hnjánum og þrjár pitsur sem hann fleygði undir fæturna á sér," sagði Ólöf. „Og þeir sem lentu í öðru sæti voru þrjú pör sem dönsuðu tangó og fleygðu pitsum á meðan," bætti Vallý við. „Þetta var alveg ótrúlegt," sagði Ólöf.