Einfari sem vinnur neðanjarðar

Mexíkóski auðkýfingurinn Carlos Slim Helu, sem nýlega skaust fram úr Bill Gates á lista ríkustu manna veraldar, er um margt sérstakur maður. Hann notar ekki tölvu, starfar að mestu í gluggalausu neðanjarðarbyrgi í heimalandi sínu og þykir afar harður í horn að taka.

Slim hefur búið alla sína tíð í Mexíkó en faðir hans var líbanskur innflytjandi sem starfaði sem kaupmaður og hagnaðist vel á fataverslun sem hann rak um árabil. Það varð snemma ljóst að Slim hefði lag á því að græða peninga því 10 ára gamall var hann farinn að selja svaladrykki á götum úti með töluverðum hagnaði.

Slim var 13 ára þegar faðir hans lést úr krabbameini og erfði hann þá tugir milljóna sem hann notaði til að fjárfesta í hinum ýmsu fyrirtækjum. Viðskiptaveldi hans í dag nær til margra ólíkra markaða, allt frá tóbaksframleiðslu til lággjaldaflugfélaga. Verðmætasta eign Slim er þó í America Movil, sem er ráðandi á fjarskiptamarkaðnum í Suður-Ameríku. Miklar hækkanir á hlutabréfum í því fyrirtæki á þessu ári valda einmitt því að Slim er nú orðinn ríkasti maður heims. Eignir hans eru metnar á 68 milljarða dollara, eða rúmlega 4.000 milljarða íslenskra króna.

Ólíkt Gates og Warren Buffet, þriðja ríkasta manni heims, hefur Slim lýst því yfir að hann hyggist ekki gefa nema lítinn hluta auðæfa sinna til góðgerðarmála. Gates ætlar til að mynda að gefa langstærstan hlut auðs síns til góðgerðamála þegar hann fellur frá en synir Slim munu erfa nánast allar hans eignir.

„Auður er eins og aldingarður. Það er í lagi að deila ávöxtunum en ekki rótunum," segir Slim og vísar til þess að hann gefur árlega tugi milljarða til ýmissa góðgerðarmála. Það þykir hins vegar alltof lítið miðað við auð Slim, ekki síst í ljósi þess að um 50 milljónir Mexíkóa lifa undir fátæktarmörkum.

„Mexíkóska þjóðin skammast sín fyrir Slim. Það er skelfilegt að einn maður skuli vera svona ríkur en svo margir fátækir," segir 26 ára hárgreiðslumaður í Mexíkó-borg. Slim stendur hins vegar fastur á sínu og segist láta gott af sér leiða með því að skapa störf og tækifæri fyrir landa sína. „Það er lítið varið í að vera jólasveinn. Að vera ríkur snýst ekki um að gefa heldur að framkvæma," segir hann.