Lítið slasaður eftir 11 metra hátt fall í Laxá

Mildi þykir að ekki fór verr þegar sextán ára piltur féll fram af brú við Laxárvirkjun í Aðaldal síðdegis í gær.

Pilturinn var á reiðhjóli og rakst á brúarhandriðið með þeim afleiðingum að hann kastaðist yfir það og hrapaði niður í gilið.

Það varð honum til happs að lenda á tré sem tók af honum mesta fallið en um 11 metra fall er af brúnni. Af trénu kastaðist hann til og lenti á klettasnös og þaðan fór hann í ána en tókst að krafsa sig upp á bakkann.

Pilturinn kallaði sjálfur á hjálp úr GSM-síma sínum og hífðu björgunarsveitarmenn hann upp úr gilinu á sjúkrabörum. Hann var fluttur á Sjúkrahúsið á Húsavík til aðhlynningar og reyndust áverkar hans minniháttar að sögn læknis á vakt.