Fólk streymdi út úr borginni í gær

Ferðalög Mikil umferð var út úr Höfuðborginni í gær enda er nú ein mesta ferðahelgi sumarsins. Viðbúnaður er hjá lögreglu og björgunarsveitum víða um land og verða þyrlur Landhelgisgæslunnar fengnar til þess að aðstoða við umferðareftirlit.

Lögreglan á Selfossi verður með aukamannskap á vakt en margir vinsælir áfangastaðir eru í umdæmi hennar. Búast má við því að margir safnist saman á tjaldsvæðum á Laugarvatni, í Þrastarlundi og við Flúðir.

„Við ætlum ekki að láta koma okkur að óvörum og verðum með auka gæslu. Ef unglingar undir lögaldri fara að hópast saman munum við grípa inn í,“ segir Jón Lárusson, varðstjóri hjá lögreglunni á Selfossi.

Margir ætla að eyða helginni í Þórsmörk og þar bjuggust staðarhaldarar við fjörlegri fjölskyldustemningu. Sömu sögu er að segja úr Húsafelli og þangað tók fjölskyldufólk að streyma í gær en þar fá ungmenni ekki að tjalda.

Tvær bæjarhátíðir standa yfir um helgina. Humarhátíð á Höfn í Hornafirði og Bíldudals grænar baunir í Bíldudal.