Pálmi fékk framsóknarvönd

„Ég ligg nú bara að mestu fyrir, það er ekki glæsilegt upplitið á manni,“ segir Pálmi Gestsson leikari sem jafnar sig nú eftir slys sem hann varð fyrir í hestaferð í byrjun vikunnar. Eins og Fréttablaðið hefur greint frá lenti Pálmi á óþekkri meri sem lék hann svo grátt að lífbeinið gliðnaði um 2-3 sentímetra. Hann fór í kjölfarið í aðgerð þar sem mjaðmagrindin var spennt saman.

„En það væsir ekki um mann hér. Starfsfólkið er alveg yndislegt og þær dekra við mann, stelpurnar. Maður er bara eins og þjóðhöfðingi,“ segir Pálmi um aðbúnaðinn á spítalanum. Í gær var Pálmi þegar farinn að ganga nokkur skref um gangana í göngugrind, fyrsta skrefið í endurhæfingu sem tekur um 6-8 vikur. „Svo kemur þetta bara rólega,“ segir Pálmi sem þegar hefur sett sér það markmið að vera orðinn góður þegar hreindýraveiðitímabilið hefst í ágúst. Hann er í það minnsta fullviss um að vera orðinn góður þegar Spaugstofan fer í loftið í september.

Athygli vakti hjá gestum sem heimsóttu Pálma á spítalann í gær að við rúmstokkinn stóð glæsilegur blómvöndur með grænum rósum. Höfðu einhverjir á orði að vöndurinn hlyti að vera gjöf frá Framsóknarflokknum, en Pálmi hefur sem kunnugt er verið duglegur að sækja sér efnivið til liðsmanna þess flokks. „Það hafa verið einhverjar getgátur um það að vöndurinn sé frá Framsóknarflokknum. Ég vil sjálfur sem minnst um það segja,“ segir Pálmi.