Nærbolur McClane á Smithsonian-safnið

Skítugur nærbolur hetjunnar John McClane úr Die Hard-myndunum, sem Bruce Willis leikur, er á meðal þess sem bandaríska safnið Smithsonian hefur fengið að gjöf vegna nýrrar sýningar. Einnig fékk safnið kynningarplakat og upprunalegt handrit nýjustu Die Hard-myndarinnar.

„Þegar ég lék í fyrstu myndinni fyrir tuttugu árum hefði mig aldrei grunað að hún yrði hluti af svona langri seríu,“ sagði Willis, sem hefur unnið ein Golden Globe-verðlaun á ferli sínum og tvenn Emmy-verðlaun. Einnig verða á sýningunni boxhanskar Rocky Balboa og inniskór Dorothy úr myndinni Galdrakarlinn í Oz.