Ekta sveitabrúðkaup hjá Hreimi og æskuástinni

30. júní 2007 02:45

Hreimur ásamt verðandi eiginkonu sinni, Þorbjörgu Sif Þorsteinsdóttur, og bráðum tveggja ára dóttur þeirra, Emblu Margréti. Fréttablaðið/GVA

Popparinn Hreimur Heimisson mun ganga í það heilaga í dag með unnustu sinni til margra ára, Þorbjörgu Sif Þorsteinsdóttur. Þetta verður sannkallað sveitabrúðkaup því athöfnin mun fara fram í Fljótshlíð og verður traktor notaður sem brúðarbíll.

„Við erum bæði úr sveitinni og vildum gera þetta svona. Það er mikil tilhlökkun,“ segir Hreimur, sem sjálfur mun þó ekki taka lagið í kirkjunni. „Þrátt fyrir að maður hafi aðgang að hinum ýmsu söngvurum til að syngja vildi ég ekkert vera að bögga þá, enda margir allt að þríbókaðir í brúðkaupum alla helgina. Ég ákvað því að gefa þeim frí og sjálfum mér líka,“ segir Hreimur.

Sönghópurinn Öðlingarnir, sem er ákveðinn kjarni úr Karlakór Rangæinga, mun syngja í kirkjunni ásamt tveimur frænkum Hreims sem syngja munu Bítlalagið Till there was you. „Þær eru 16 og 17 ára, sprenglærðar í píanó og söng, og mér fannst tilvalið að gefa þeim tækifæri,“ segir Hreimur sem á síðan afmæli á morgun – verður 29 ára gamall.

Fyrsta lagið af væntanlegri plötu Hreims og Vignis Snæs Vigfússonar er komið í spilun, en það heitir Ástfanginn og er eftir Hreim. „Ég samdi lagið fljótlega eftir að dóttir mín fæddist en textinn varð til þegar við vorum við upptökur á plötunni í Danmörku á síðasta ári. Ég var farinn að sakna stelpnanna minna og þá varð þessi texti til,“ segir Hreimur en lagið hefur hlotið góðar viðtökur á útvarpsstöðum landsins.

Hreimur og Vignir hafa verið að spila saman síðustu þrjú ár og koma oftast fram tveir einir, með gítarinn og röddina að vopni, eins og Hreimur segir frá.

„Okkur líkar einstaklega vel við þetta form. Við erum í nánara sambandi við fólkið í salnum og náum að kynnast því miklu betur,“ útskýrir Hreimur en hann og Vignir munu reyna að koma fram í sumar þegar tími gefst til. Þá er líklegt að hljómsveitin Land og synir fari aftur á stjá í haust. „Það er mikið að gera hjá meðlimum sveitarinnar og hljómsveitin er ekki númer eitt í forgangsröðinni. En við viljum að sjálfsögðu hlúa að okkar vörumerki og stefnum á að gefa út eitt lag,“ segir Hreimur.